Түлек ауылына балабақша салып берді

0

Бүгінгі таңда елдімекендерде игілікті істердің төбе көрсетуіне облыс әкімі Б.Сапарбаевтың «Жомарт түлек» жобасы сеп болып жатқаны жасырын емес.

Жобаның түпкі мақсаты туған жеріне қарайласу, түлеп ұшқан төрін түлету, ауылының әлеуметтік-экономикалық даму көрсеткішін жоғарылату болып табылады.

Иә, дөп солай. Аймақ басшысы аталмыш форумда осылай деген болатын.

Облыс орталығында бастау алған форум Жамбыл ауданында жалғасып, оған түрлі салада қызмет етіп жүрген 400-ден аса мектеп түлектері қатысып, жобаның негізгі мүддесіне қаныққан еді.

Аудандық форумда Жамбыл ауданының әкімі Сәкен Арубаев сөз алып, түлектердің демеушілігімен 18 жобаның іске асырылуына 118 млн теңге жұмсалатынын айтып, қолы ашық азаматтарға лайықты құрмет көрсетіп, ауыл-аймақтың гүлденуіне барша азаматтарды шақырған болатын.

Сол форумнан кейін ауданда ерекше қозғалыс байқалды

Енді сөзден-іске көшер болсақ, Жамбыл ауданының түкпір-түкпірінен аталмыш жоба жеміс бере бастады.

Атап айтар болсақ, Шайдана ауылында 10 млн теңге ге спорт музейі мен спорт кешенін жеке кәсіпкер Әділ Байұзақов салып берсе, Ащыбұлақ ауылының 1984 жылдары туылған азаматтары 2 млн теңге ге балаларға арналған ойын алаңшасының құрылысын, Шоқай, Ш.Ниязбеков ауылындағы білім ордасын 20 жыл бұрын аяқтаған түлектер ауылдарына келбетті арка орнатты.

Олардың әрқайсының құрылысына 1,5 млн теңге жұмсалса, қаракемерліктер ерекше форматта бой көтерген ауыл қақпасына 2 млн теңге жұмсаған.

Бұдан бөлек Ақбұлым ауылындағы Б.Бесбаев атындағы мектеп-гимназиясының 2001 жылғы түлектері білім ордасына демалыс алаңшасын ашып, 1 млн теңге ге су бұрқақтарын орналастырған.
Бізге әзірге мәлім мәлеметтер осы ғана.

Ал бүгінгі тақырыбымыз Ақбұлым ауылындағы жағымды жаңалыққа арналмақ.
Ауыл азаматы, мектеп түлегі, «Шаңырақ 7» жауапкершілігі шектеулі серіктестігінің өкілі Гүлзат Ташбаева 21 млн теңгесіне балабақша ашып, ауылдың гүлденуіне өз үлесін қосты.

— Елдің қажетіне арнап балабақша салып отырмыз. Туған жерге із қалдыру әр азаматтың көкейінен ажырамауы қажет. 50-ге жуық балғындарға тәрбие беретін балабақшаны орталық көшеден аштық.
Ашылуына ауыл қарияларын шақыртып, ақ батасын алып, алғашқы тәрбиеленушілердің өнеріне көз тіктік. Мұнда жергілікті тәрбиешілер мен басқа да азаматтар жұмыспен қамтылады. Нысанның іші қажетті керек-жарақпен, заманауи қүрылғылармен, сергіту, ойын алаңдарымен қамтамасыз етілген. Осы орайда игілікті жобаға барша кәсіпкерлерді үн қосуға шақырамын, — дейді Гүлзат Әбдібайқызы.
Расымен де, аймақ басшысының бұл жобасы ауылдың ажарын аша түсетінін ескерсек, бұл орайда жамбылдық түлектердің атқарып жатқан жұмысы жетерлік.

Ақжігіт Жетпісбай,
Жамбыл ауданы

Leave A Reply

Your email address will not be published.