Түзеу мекемесінің тәртібін бұзушылар тыйылмай тұр

0

Жамбыл облысында түзеу мекемесіне тыйым салынған заттарды кіргізбекші болғандардың қатары сиремей тұр. Жуырда облыс бойынша ҚАЖ департаменті ЖД-158/2 мекемесінде бір күнде дәл осындай 2 факт тіркелді.

Алғашқы оқиға кешкі сағат 18:45 шамасында орын алған. ЖД-158/2 мекемесі патрульдік тобы, 5513 әскери бөлімі штабы бастығының аға көмекшісі С. Қыдыров және аталған әскери бөлім қызметкерлері мекемеге жақын аумақтағы электр подстанциясының маңынан күдікті азаматты қолға түсірген. Ұсталған 1998 жылғы Н. О. есімді бұрын сотты болған азамат мекеме аумағына тыйм салынған затты лақтырып үлгерген.

Осыған орай, мекеменің лақтыру фактісі орын алған аумаққа офицерлердің кезекші тобы мен бақылаушылардың әскери наряды жөнелтіліп, қоршауға алынған. Нәтижесінде наубайхана маңынан жапсырма лентамен оралған 2 дана түйіншек табылған.

Келесі оқиға 21:40-та тіркелген. ЖД-158/2 мекемесі патрульдік тобы, 5513 әскери бөлімі қызметкерлері Тараз қаласы ПБ ППБ қызметкерлерімен бірге мекемеге жақын аумақтан 3 азаматты ұстаған. 1992 жылы туған Нұр-Сұлтан, Тараз және Жаңатас қалаларының тұрғындары мекеме қоршауынан асырып, тыйым салынған заттарды лақтырмақ болған. Кейін анықталғандай, ұсталғандардың екеуі бұрын сотты болған.

Қолға түсіру кезінде олардан құрамында спирті бар сұйықтық құйылған 4 дана пластик шөлмек табылған.

Аталған жағдайларға байланысты Тараз қаласы ПБ кезекші жедел-тергеу тобы шақыртылып, Жамбыл облысы бойынша Қылмыстық-атқару жүйесі департаментіне, прокуратураға және ҰҚК Жамбыл облысы бойынша департаментіне хабар берілген.

Leave A Reply

Your email address will not be published.